شيئ غريب لما تعرف بأنك عايش مع شخص سنين طويله وما تعرف أدق تفاصيله , رغم إنك مؤمن بأنك تعرف عنه كل شيئ وبأنه كتاب مفتوح بالنسبه لك تقول لنفسك
مافيه شيئ جديد ممكن أعرف عنه ولكن تتفاجئ بأنه فيه شامة بإيده مإنتبهت لها قبل وجرح قديم ما تعرف كيف ومتى صار
هذي حياة معظم الناس وحن مش طالعين من هذا الموضوع
في الحقيقة هذا الزمن والوقت من أكثر الأزمان الي مرت على مر التاريخ الإنسان يكون منفصل عن كل شيئ بالحياه , العمق والحميميه نادرة مثل الي يبحث عن ورود بالصحراء
وأكثر فتره يعيش فيها الإنسان ضغط , قلق , توتر منقطع النظير مفروض أكون زي هذا الشخص الفلاني , أتمرن زي الشخص الفلاني , أسوي دايت زي الشخص الفلاني ,وأكون فيقن ,نباتي , كيتو , صيام متقطع ليش ما أسوي زي فلان وأعيش حياه مثاليه ؟
ضغط مستمر ومن جميع الجهات ومن أهم جهه وهي الضغط الداخلي
فنسينا كيف يعيش الواحد حياته بدل ما يجري للحظه الي ورا هذي اللحظه واللحظه الي وراها وكإننا في سباق سرعه ماله بداية ولا نهاية
نسينا كل شيئ لما نكبر ننمنى نكبر ولما كبرنا نتمنى نصغر , نبغى نرّجع روح الطفل الي يستمتع بالحياه بكل تفاصيلها وما يفكر بإيش مفروض يعمل ومن مفروض يقابل او يتوتر لإنه ما عمل وأنجز الي مفروض ينجزه وما قابل الي مفروض يقابله
فقدنا هويتنا , فقدنا العمق بعلاقاتنا و فقدنا أنفسنا بالنهاية وعشان نرّجع روح الطفل الي بداخلنا لازم نعرف بأن الطفل هو كومة من الفضول وحب الإستكشاف والإنبهار
اعط الطفل ورقه ملونه عليها شوية قلتر وشوف كيف يناظرها ويتعجب منها وعطها لشخص كبير ورح يرميها او يقطها بالزبالة
فعلشان نعيش حياه لها معنى لازم نعيش حياه مختلفة بعيدة كل البعد عن السطحية الي نشوفها ونعيشها بكل مكان
نحتاج نتأمل اللوحة الي معلقه من سنوات ونلاحظ تفاصيلها ,هل سبق وتأملت فيها وناظرت فيها لتستكشفها بصدق ولتفكر بالمراحل الي مرت عليها لتوصلك ؟
جربت تتأمل الزخارف الي بسجادتك وتفكر بكيف تصممت ومن الشخص الي رسمها قبل تكون واقع وإيش ممكن يكون إسمه , عائلته ,حياته ,جنسيته وإيش نوعية أكله مثلاً؟
أكثر شيئ يخوفني إني أكتشف إني عشت حياه سطحيه ,الأشخاص الي توقعت بأني اعرفهم ما أعرفهم صح واللحظه الي كنت أطارد لأوصلها كانت وهم
